Parang langay-langayan

PARANG LANGAY-LANGAYAN

para lamang akong langay-langayang nasa hawla

di tulad ng langgam na laging maraming kasama

walang magkomento sa pahayag kong nagawa na

para sa pinagsisilbihang samahan at masa

kahit sa panawagang katarungang panlipunan

o pagbago sa sistemang tadtad ng kabulukan

kahit sa nalikhang tula para sa sambayanan

upang kung may mali sa sinabi'y aking malaman

tila baga walang mga kasangga o kakampi

bahala ka diyan, sa pag-iisa'y tanging saksi

para bang langay-langayang ayaw nilang makanti

o kaya'y kalabitin man lang gayong magkatabi

tila ako langay-langayang kanilang nabihag

naduling sa bitag, isip kasi'y anong maambag

sana'y may magkomento na sa tula ko't pahayag

nang di madama ang pag-iisa't buhay na hungkag

- gregoriovbituinjr.

* litratong kuha ng makatang gala sa lalawigang kanyang napuntahan