Sa kisame

SA KISAME

sa kisame napatitig

nang binti niya'y namitig

subalit di natigatig

sa paghuni ng kuliglig

madaling araw pa lamang

ngunit siya na'y nag-abang

ng pagputok ng liwanag

upang lihim ay mabunyag

ng naggapangang butiki

na naroong bumabati

sa makatang winawari

ang pangarap niya't mithi

tila di pa niya arok

sino kaya ang papatok

kung sa halalan kalahok

ang mga itlog na bugok

ah, tuloy lang sa layunin

kaya kumikilos pa rin

upang dalita'y hanguin

sa hirap na anong talim

di sasapat ang kataga

upang kathain ang tula

kahit tatlong metrong haba

ang kanyang pagkatulala

- gregoriovbituinjr.

02.20.2022