Ang luto ni misis

ANG LUTO NI MISIS

anong sarap ng luto ni misis

na ginisang hipon at kamatis

kapara'y pagsintang anong tamis

kaya aking gutom ay natanggal

sa buong maghapon ay tumagal

tanda ng totoong pagmamahal

tila ako'y nasa alapaap

ng aking mga pinapangarap

na buhay na'y di aandap-andap

ika nga, busugin mo ang sinta

alamin mo ang kanyang panlasa't

tatagal ang inyong pagsasama

ah, salamat sa ginisang hipon

na kung himbing ka'y mapapabangon

upang malasap ang sarap niyon

- gregoriovbituinjr.

04.30.2023